Што е најкорисно да се прави во ноќта Лејлетул-Кадр?

Прашање: Можете ли да ми кажете кои ибадети се најкорисни за извршување во ноќта Лејлетул Кадр?

Одговор: Вашето прашање е повеќе од оправдано. Куранско-хадиските аргументи го потврдуваат фактот дека правењето ибадет во ноќта Кадр е повредно од правењето ибадет во илјада месеци во кои ја нема таквата ноќ. Возвишениот Аллах вели: „Ние почнавме да го објавуваме (Куранот) во ноќта Кадр! А што мислиш ти, што е ноќта Кадр? Ноќта Кадр е подобра од илјада месеци.“ (Куран, 97:1-3 ) Аллаховиот Пратеник ﷺ рекол: „Ви дојде благословениот месец, во него е ноќта подобра од илјада месеци. На кој му е ускратени доброто во оваа ноќ, нему му е ускратено сето добро, и нема да му биде ускратено освен на вистински несреќниот.“ (Ибн Маџе од Енес ибн Малик, бр. 1644 – неговата веродостојност ја потврдил и шејхот Албани и рекол; хасенун-сахих.)
Исламските научници спомнале три вида на ибадети со кои, меѓу другото, човекот може да ја заврши оваа благословена ноќ:
Намаз – Аллаховиот Пратеник ﷺ рекол: „Кој ја поминува ноќта Кадр во Кијам (намаз) верувајќи во нејзиниот благослов, барајќи награда од Семоќниот, неговите претходни гревови ќе му бидат простени.“ (Бухари и Муслим) Целата ноќ е генерално време во кое е дозволено да се извршува нафиле намазот, затоа верникот треба колку што е можно повеќе да ја помине ноќта Кадр во намаз.
Дова и зикр – спомнувањето на Аллах; намазот и зикрот се пропишани општо, а особено намазот кој бил спомнат во хадисот на Аиша, Аллах нека е задоволен со неа. Аиша, Аллах нека е задоволен со неа, го прашала Аллаховиот Пратеник ﷺ: „Аллахов Пратенику, кога би знаела дека е ноќта Кадр, што да му довам на Аллах таа ноќ?“ Аллаховиот Пратеник ﷺ рекол: „Кажи: اللَّهُمَّ إِنَّكَ عَفُوٌّ تُحِبُّ الْعَفْوَ فَاعْفُ عَنِّي Аллахумме иннеке афувун тухиббул афве фа'фу 'анни ,Господару мој, Ти си Тој што простува и сакаш прошка, па затоа те молам да ми простиш.‘“ (Тирмизи, од Аиша, Аллах нека е задоволен со неа, оценет како веродостоен од Шејх Албани ) Овој хадис недвосмислено укажува на пропишување на дова до Аллах во оваа благословена ноќ.
Рецитирање на Куранот – Месецот рамазан генерално е месец на поминување време со Куранот, особено во ноќта на Кадр, кога ибадетот е подобар и повреден.
Ибн Месуд, Аллах нека е заоволен со него, пренесува дека Аллаховиот Пратеник ﷺ, рекол: „Кој ќе прочита една буква од Аллаховата Книга, ќе има награда, а наградата се зголемува десеткратно. Не велам дека ,елиф-лам-мим‘ е еден харф, туку ,елиф‘ е харф, ,лам‘ е харф и ,мим‘ е харф.“ (Тирмизи, хасен-сахих) А Аллах најдобро знае.